4 Settembre 2015 News 0 comment

Visita da l’Uniun grischuna da mansteranza

Als 1. gün s’inscuntran ils delegats da l’Uniun grischuna da mansteranza a Sta.Maria. Tenor la presidenta da l’Uniun da mansteranza jaura, Gabriella Binkert Becchetti, as voul far attent in quist’occasiun a la situaziun difficila sco lö da cunfin.

«Per noss’Uniun da mansteranza e commerzi esa üna grond’onur da pudair bivgnantar quia in Val Müstair ils delegats da l’Uniun grischuna da mansteranza», disch la presidenta da l’Uniun da mansteranza e commerzi jaura, Gabriella Binkert Becchetti. Cha l’Uniun grischuna da mansteranza saja cun 7000 commembers la plü grond’uniun grischuna. Cha’ls bundant 120 delegats rivan in Val Müstair per salvar lur radunanza generala esa d’ingrazchar a l’ingaschamaint da Jürg Michel, directer da l’Uniun grischuna da mansteranza, ed a Godi Hohenegger, il vicepresident da l’Uniun da mansteranza e commerzi jaura. La radunanza cumainza in venderdi, ils 1. gün e finischa in sonda cun ün program accumpagnant.
Preschaints saran eir il cusglier guvernativ Hansjörg Trachsel e’l cusglier naziunal Josias Gasser. Per Binkert Becchetti significha quist arrandschamaint eir üna schanza per demuossar las sfidas chi existan in Val Müstair pel commerzi e la mansteranza. Ch’in Val Müstair stopchan las gestiuns cumbatter culs problems tipics da regiuns situadas a l’ur dal pajas. Eir in Val Müstair exista il «turissem da cumprar aint» pro’ls vaschins dal Tirol dal süd o perfin da l’Austria. «Ils indigens nu’s sun adüna consciaints cha mincha franc ch’els spendan i’l ester manca a la regiun»  intun’la, «la chadaina da la valur agiunta sto funcziunar e cha scha pro quella manca üna rincla, nu funcziuna plü nöglia».
Gabriella Binkert Becchetti es gnüda eletta be d’incuort sco presidenta da l’Uniun da mansteranza e commerzi da la Val Müstair. Ella voul in quista funcziun in avegnir sensibilisar la populaziun indigena da cumprar aint illa regiun. «Scha tuots pensan cha sur cunfin pona per exaimpel mangiar plü bunmarchà nu’s stoja dar da buonder sch’eir ils giasts fan quai», rend’la attent. Ch’in Val Müstair saja important cha la chadaina economica resta cumpacta: Quai dal paur al mansteran fin pro la gastronomia. Ün ulteriur böt ch’ella voul ragiundscher es da procurar cha’ls affars e las gestiuns in Val Müstair gnian surtuttas da la generaziun giuvna. «Fermamaing a cour am sta però da pisserar in Val Müstair per plazzas da lavur e cun quellas la pussibiltà da viver quia», disch’la. Cha la plü pitschna scoula industriala da la Svizra, a Sta. Maria, possa exister inavant es per ella ün’ulteriura sfida per s’ingaschar. A Sta. Maria absolvan tanter oter eir las giarsunas da mansters textils lur cuors da blocs da scoula. «Causa cha la scoula es pitschna vegnan instruits giarsuns da differents mansters in üna classa», disch’la. Quel fat promouva a seis avis il pensar social e pissera ultra da quai cha la scoula possa surviver eir in avegnir. «Las sfidas in mia nouva funcziun sun grondas», conceda Gabriella Binkert Becchetti. Ch’ella s’allegra però da pudair tillas tour per man e cha cun sustegn da la suprastanza da l’Uniun da mansteranza e commerzi da la Val Müstair e da l’Uniun grischuna da mansteranza tilla reuschirà quai sco ch’ella spera.
Autor: ANR

http://www.engadinerpost.ch/2012/05/visita-da-l%E2%80%99uniun-grischuna-da-mansteranza.html